អ៊ុយក្រែន៖ ប្រធានាធិបតីអ៊ុយក្រែន លោក Volodymyr Zelenskyy បានអំពាវនាវឱ្យពលរដ្ឋអ៊ុយក្រែនស្ងប់ចិត្ត និងរឹងពឹងក្នុងការទប់ទល់នឹងបញ្ហាអាកាសធាតុនារដូវរងារនេះ ខណៈដែលរដ្ឋាភិបាលបានប្រឹងប្រែង និងខិតខំដើម្បីស្តារឡើងវិញនូវប្រភពថាមពល និងរចនាសម្ព័ន្ធនានាដែលបានខូចខាត ដែលកើតឡើងដោយការវាយប្រហារផ្លូវអាកាសពីកងទ័ពរុស្សី។
គួរបញ្ជាក់ថា កងកម្លាំងរុស្សីបានធ្វើការវាយប្រហារយ៉ាងសន្ធាប់ទៅលើហេដ្ឋារចនាសម្ព័ន្ធផ្គត់ផ្គង់ថាមពលរបស់អ៊ុយក្រែន តាំងពីដើមខែតុលា ឆ្នាំ២០២២មក ដែលធ្វើឱ្យមានការដាច់ថាមពលអគ្គិសនី បណ្តាលឱ្យមនុស្សរាប់លាននាក់ជួបប្រទះបញ្ហាមិនមានកំដៅ ខណៈសីតុណ្ហភាពកំពុងធ្លាក់ចុះ និងត្រជាក់ខ្លាំង។ លោក Zelenskyy បានអំពាវនាវឱ្យប្រជាជនអត់ធ្មត់ និងរួបរួមគ្នាជាងពេលណាៗទាំងអស់ទល់នឹងបញ្ហាកង្វះថាមពលនារដូវរងារនេះ។
អនុរដ្ឋលេខាធិការទទួលបន្ទុកកិច្ចការនយោបាយអន្តរជាតិរបស់សហរដ្ឋអាមេរិក លោកស្រី Victoria Nuland បានលើកឡើងថា ប្រធានាធិបតីរុស្សី លោក Vladimir Putin បានឈានដល់កម្រិតមួយទៀតនៃការធ្វើសង្គ្រាម ពោលគឺលោកបានប្រើប្រាស់យុទ្ធសាស្រ្ត "barbarism" ដោយកាត់ផ្តាច់ពន្លឺពីជនស៊ីវិល។
ដោយឡែក ឆ្លើយតបនឹងការឈ្លានពានរបស់រុស្សីចំពោះអ៊ុយក្រែន បណ្តាប្រទេសលោកខាងលិចបានឆ្លើយតបវិញដោយការដាក់សម្ពាធលើរុស្សី ដោយបានប្រជុំកំណត់លើតម្លៃនៃការទិញប្រេងឆៅពីរុស្សីក្នុងតម្លៃមិនលើសពី ៦០ដុល្លារក្នុងមួយបារ៉ែល ដែលការកំណត់តម្លៃនេះបានចូលជាធរមាននៅថ្ងៃចន្ទនេះ។ ឆ្លើយតបនឹងបញ្ហានេះ ឧបនាយករដ្ឋមន្រ្តីរុស្សី លោក Alexander Novak បញ្ជាក់ថា រដ្ឋាភិបាលក្រុងម៉ូស្គូបាននឹងកំពុងធ្វើការងារប្រឆាំងនឹងការកម្រិតតម្លៃប្រេងឆៅរបស់រុស្សីនេះ។ លោកបានបន្តថា៖ "យើងនឹងធ្វើការលក់ចេញប្រេងឆៅ និងប្រេងឥន្ធនៈទៅកាន់បណ្តាប្រទេសដែលបញ្ជាទិញក្រោមលក្ខខណ្ឌទីផ្សាររបស់យើងប៉ុណ្ណោះ បើទោះបីជាយើងនឹងត្រូវបន្ថយបរិមាណផលិតបន្តិចបន្តួចក៏ដោយ"៕
